點解會讀中醫？

故事發生係2003年。

當年除了發生沙士之外，亦係我考A level 的一年。

在沙士之前，當時的行政長官董伯伯在施政報告話要將香港打做成中醫中藥港。

當時看起來這一程前途和錢途無限，但這並不是我選這科的主要原因。在Jupas 選科時，我第一個志願是填上藥劑，第二個是中醫，第三個是環境科學。

那些年，我很天真，因為以我的成績是肯定可以入大學，也沒有自己的想法。反正讀邊科對我黎講都無所謂，只要不是金融，工程就行了，因為我不喜歡計數。

結果，藥劑學給予我一個面試的機會。我很求其就去interview，t-shirt牛仔褲，完全無準備的。結果當然沒有取錄我。到後來，我才知道，成績最好的五十個學生才有機會interview。

雖然我落選了，但我沒有唔開心，因為我知自己係唔想讀藥劑，我喜歡讀環境科學搞環保。我也慶幸藥劑學系沒有取錄我。

至於為何要選中醫，很主要的原因是因為我媽媽。我媽以前經常服中藥，令我對中藥很感興趣。見人地拎堆樹枝樹皮，一粒二粒包埋一包，煲下煲下就醫好病，真係好得意。所以我中三，中四就會跟我媽去睇中醫，又會飲苦茶。

在我做醫師之前，我一直無想過自己會做醫生。我讀中醫，只係覺得要研究中藥，就要讀中醫。誰不知原來有科叫biochem ，應該讀呢科先真。不過，既然洗濕左個頭就繼續讀落去。

相信大家都明白，當你越唔想讀一樣嘢，你嘅成績就一定會越差。所以頭兩年，我的成績只屬中下，也有想過轉系。但轉系的大前題是成績好，哈，都唔知邊個定呢個規矩出黎嘅。

於是乎，我就走左去找一個讀biochem 嘅職員，請佢介紹我去做lab喇。個陣大學生做呢啲職位係有人工，都有50蚊一個鐘，但係我係無收錢。
無錢都做？係呀，因為我鍾意囉。我仲連堂都唔上走去學人地點做化學分析，點去由一啲amino acid砌自己想要嘅蛋白質出黎。又學識點劏老鼠。咁就快樂地過左我嘅year 2。仲識左幾個好朋友。

成件事嘅轉捩點係year3。當時要讀嘅科目主要係臨床科目，內科，外科，婦科，兒科，骨傷科，針灸科等。雖然之前兩年成績唔係咁好，但爛船都有三斤釘。一到臨床科目，就用返以前死記爛記嘅中藥呀，方劑呀咁，加上見嘅病人多左，明白以前學嘅嘢用返出黎係work，就係咁，就愛上了這個中醫學。

當時我的帶教老師（臨床醫師）都很好，很多時都叫我們大膽處方，給他過目，對的，就直接給病人，不對的，就稍作加減。這樣子，就知自己開的處方幾有料到。

多數病人都會好轉。這個工作，每個病人就是一道試題，不能不用腦。

我就是這樣愛上我的工作。

待續。

下一回講下我的中醫課程。