2014年6月號 JMEN《虛火實火》

虛火實火

睇波識得睇一定係睇直播。睇得直播，難免要捱夜；捱得夜，就好易有火。呢個火，一係「實火」一係「虛火」。虛火者，捱夜也；實火者，輸波也。

「實火、虛火」點分？現代既足球，除左係將皮球送入網窩裡面，仲要講求有實力，有速度，同埋最緊要攻守兼備。現實並唔係每隊波都可以做到以上各點，一些實力較遜的隊伍遇著勁旅，本住「場波邊隊能夠入一『粒』先，果隊就會有優勢」的道理，弱隊在開波頭十分鐘「以蔗渣既價錢，踢出燒鵝既味道」，攻勢可以水銀瀉地，可惜由於基本質素較差，堅持不了九十分鐘，一旦被對手掌握節奏，形勢必然會逆轉，「單刀橫傳」不在話下，「底線傳底」更是常見。這種情況，就是虛火。本身正氣不足而出現「熱」的症狀：手足心熱、心煩氣躁、喉嚨乾涸、牙肉浮腫、口乾等，都是由於陰陽中的「陰」少了，陰陽失去平衡，「陰不制陽」而出現。

當睇完場波身體出現虛火，就要「滋陰降火」。

石斛花旗參飲 (1人份量)

材料：石斛 5克 花旗參 10克 麥冬 15克

做法：將石斛、麥冬加入1000毫升水浸泡。開火煮半小時後熄火，加入花旗參焗10分鐘，放暖後加入蜂蜜調味，代茶飲用。

至於實火，就好似一隊有實力的球隊打逆境波。時間無多，一時心急就會茅，防守球員犯左腦筋上既錯誤，越踢越亂。打茅波，有火氣，就是實熱。患者正氣不虛，一時熱盛，就會全身發熱、口渴喜凍飲、滿面通紅、甚至生暗瘡、口瘡。既然「好波不妨一睇再睇」，實熱也不妨一清再清。射波最緊要射中個龍門，清熱最緊要清中個臟腑，市面上有些「乜熱清」或者「清乜酷」，很多時都有白茅根和菊花的成份，白茅根可以清肺熱，菊花可以清肝熱，所以要分清楚邊個臟腑有熱氣，再用合適的中藥去處理。

睇波食薯片食蝦條，可以出現「生飛滋」、口臭便秘等胃熱症狀；支持的球隊輸波未能出線，出現肝熱就會情緒激動、口乾口苦、容易頭兩側痛、眼乾眼紅等。要清胃熱可以食西瓜，清肝熱可飲夏桑菊：

夏桑菊 (1人份量)

材料：夏枯草15克、桑葉10克、菊花10克

做法：將夏枯草、桑葉加入1000毫升水浸泡。開火煮半小時後加入菊花煮5分鐘，隔渣。按個人喜好加入冰糖調味，即可飲用。

波唔使講架，球迷自己識睇。等左四年希望今次六十四場波都只可以用「一個字」黎形容：精采。